شو يعني المسيره؟ فيكُن تقولو دفتر ما بينكتب علَيْه إلاّ بالجمر المروَّس، وقجِّة غضب، وِ ابْريق حلا، وجرِّة وفا، وقرميد بُطولِه... وفيكُن تقولو صبيِّه إلاّ خمسَه وعشرين ربيع عم تندر حلاها لَ حبيب إسمو الوطن، وعم تِخْلَقو وتنطرو تا يجي بالوقت زاتو. مين بيكْتُب بالمسيرَه؟ الناس اللي بيرتاحو بالتَّعب، وما بيشَبِّعُن إلاّ الرغيف الزغير، وبيصِيرو مع الوقت زاكرة الوقت، ويوم بيحبّو ألله قبل لبنان ويوم لبنان قبل ألله، وما حدا بيلَبِّسُن تاج لأنُّو جبينُن التاج، والكلمِه الحُرَّه بتُوقَفْ عا كتاف قلامُن ماسكِه عالدَّبكِه، لأنّو الوطن بيضِيق بـْ أوقات كتيرِه، وبتصير كتاف قلامُن الوطن وأهل الوطن.

مين بْيِقرا المسيرَه؟
الناس لْ ما بيحبّو يشْبَهو حدا إلاّ حالُن، وبيفتّشو عالحقيقَه لْ مش بايس تمَّا إلاّ إمَّا، وبْيِعْشَقُو الرّيح الطالع من المحابر وعم يهزّ الغصون لْ ما حدا بيسترجي يْفْلِت نَسْمِه صَوْبا، وبيحبّو يسمعو صوت الجراس العاليه لْ ما بيدقّا إلاّ قلام المسيرَه...

ومين بيقول للمسيرَه: يسْلًمو ديّاتِك؟
الناس الطيّبين لْ ما بيشِطّ رِيقُن عالكراسي، والشُّهَدَا هنّي أوَّل هالناس، لأنُّن عرْبَشو عا ترابُن طلوع تا يخْلَص وطن الكراسي ويبلِّش وطن الإنسان، وما فكَّرو ولا مرَّه إنّو معقول حدا يعربش عا ضلوعُن تا يوصَل عالكراسي...
كل اللي إلُن إيدين بيقولو للمسيرَه: يسلمو ديَّاتِك، ووَحْدُن اللي حاسِّين إيدَيُن عم يقْصَرو رح يموتو غيرِه من إيدين المسيرَه.
ومين قليل الوفا مع المسيرَه؟
شْوَيّ من الناس اللي ضَوِّتلُن صابيعا شموع هنِّي وعم يصيرو بالعتمِه تمسال العتمِه... وشْوَيّ من الناس لْ ما بْيِقْدرو يكونو أوفيا متلا، لأنّو الوفا بدّو شجاعَه وبطولِه... وشْوَيّ من الناس لْ بيخافو يفوتو عا زاكرتُن تا ما يعرفو حالُن قدَّيش تغيَّرو وما عادو يشبهو حالُن بـ مراية الحقيقَه...

ليش بعدا المسيرَه؟
لأنّا مَرَقِت بالموت وما ماتِت. نَزَفِت عا بساط الشَّوك كتير، بَسّ ما ماتِت... مار شربل عبَّالا سراجا من زيتاتو وقَلاَّ: ضَوِّي من هَون لَ آخر الدِّني... والشُّهَدَا عملو "إشتراك" سَنَوي معا بالصّلا: هنيّ بيصَلّو عا طول السّنِه، وهيّي بتدقّ بواب أحبابا عا طول السّنِه...

إزا قالت المسيرَه: "بَدّي فِلّ"، شو بيصِير؟
كتار رح يجو عالمسيرَه جايبين عا زنودُن باقات الفِلّ، لأنُّو ما حدا بيصدِّق إنّو المسيرَه بتقصد: "بَدّي رُوح".
المسيرَه زهرة الصَّعب، وقُونِة الشُّهَدَا، وهالزَّهره لا وراقا بْيِدبلو ولا عطرا بيخْلَص، وهالقُونِه مِنْغَسِّلا كلّ يوم بالحبر الحلال تا تْضَلّ لَمْعِتا تفرفح قلوب الأوفيا، وتعقص صدور اللي صار عندُن الوفا مَوضَه قديمِه.

قزحيا ساسين
kozhayasassine@almassira.com